Kjo është gomonia me hashash që u braktis ditën e shtunë në ishullin e Sazanit dhe që po transportonte 1 ton e 207 kilogramë hashash, nga Shqipëria në drejtim të Italisë.<br /><br />Pas braktisjes nga trafikantët, mjeti lundrues u lokalizua nga Policia e Vlorës në bashkëpunim me Delta Force dhe Guardia di Financa, në afërsi të ishullit të Sazanit.<br /><br />Policia dyshon se ajo është sjellë nga Italia nga trafikantë shqiptarë. Pas verifikimeve të para rezulton se ajo nuk është e regjistruar në Shqipëri. Po ashtu, as motorët e saj të fuqishëm YAMAHA, me 350 Kuaj Fuqi, nuk janë të regjistruar në vendin tonë.<br />Burime nga grupi hetimor thonë se ajo mund të jetë vjedhur në Itali, me qëllimin që të përdorej për trafik droge nga Vlora drejt brigjeve të vendit fqinj.<br /><br />Arsyet se përse ajo u braktis në det janë të paqarta. Dy motorët e fuqishëm u gjetën të shkëputur nga gomonia dhe hetuesit dyshojnë se ky mund të jetë një prej shkaqeve.<br /><br />Sipas tyre, pas defektit që mund të ketë ardhur si pasojë e dallgëve të fuqishme, trafikantët kanë mundur të largohen me ndihmën e një mjeti tjetër lundrues.<br />Policia është vënë në kërkim të tyre, por deri tani nuk ka arritur të gjejë gjurmë që t?i çojnë drejt identifikimit. Gomonia është transportuar në vështirësi në Radhimë, si pasojë e detit të trazuar./tvklan.al
