Familjarët dhe të afërmit e 26 personave që humbën jetën 9 vite më parë kanë bërë homazhe sot në Gërdec, ndërsa nuk ka qenë asnjë zyrtar apo politikan.<br /><br />Viktimat janë kujtuar sot nga familjarët dhe miqtë e tyre me lot, dhimbje dhe kujtime në memorialin e ngritur në fshatin Gërdec.<br /><br />Familjarët akuzojnë edhe pas 9 viteve se drejtësia ende nuk është vendosur në vend, ndërsa shprehen se nuk do të heqin dorë deri kur autorët të jenë pas hekurave.<br /><br />"Mos i harrofshim asnjëherë dhe i kujtofshim gjithmonë. Ata u vranë, nuk u mbytën në det. Më vjen keq që politikanët nuk vijnë njëherë dhe të thonë dicka, tregohen frikacakë.<br /> <br />Shteti nuk është interesuar njëherë sesi jetojmë ne në këtë fshat. Drejtësi nuk ka, marrin votën dhe asgjë.<br /> <br />Gazetarët na janë gjendur në ditët më të vështira" u shpreh Gëzim Deliu. Familja Deliu është një nga familjet më të dëmtuara nga tragjedia e 15 marsit 2008. Të afërmit ishin sot për të vënë lule në vendin ku mbetën të vdekur, Liljana, Jetmiri, Flavio, Irena dhe Qemal Deliu.<br /><br />Nëntë vjet më parë, Shqipëria u trondit nga një shpërthim vdekjeprurës në Gërdec ku humbën jetën 26 persona, u plagosën 300 të tjerë, ndërsa u rrafshua i gjithë fshati.<br /> <br />Të implikuar në ngritjen e fabrikës së vdekjes ishin familjarë të ish-kryeministrit Sali Berisha dhe disa ministra të asaj kohe.
