Shtatë persona, dy prej të cilëve italianë, janë arrestuar nën akuzën e trafikimit të drogës nga Shqipëria drejt Italisë.<br /><br />Prokuroria për Krime të Rënda tha se në bashkëpunim me Prokurorinë e Leçes ka arritur të zbulojë një grupin prej të paktën 7 personash, nga të cilët 5 shqiptarë dhe 2 italianë, të cilët trafikonin drogë me skaf nga Gjiri i Lalzit, në Durrës dhe destinacion brigjet italiane.<br /><br />Në pranga kanë përfunduar Eduart Sallaku, Vitor Brahja, Jurgen Brahja, Gjon Brahja, Lazër Lazri dhe dy italianët Gianfranco Maiorano dhe Donato Carlucci.<br /><br />Prokuroria tha se shtetasit shqiptarë janë ndaluar të enjten, ndërsa italianët të premten në darkë.<br /><br />Italianët u kapën nga policia në brendësi të pyllit pranë Gjirit të Lalzit. Në operacion u sekuestrua edhe skafi me të cilin do të kryhej trafikimi i lëndës narkotike.<br /><br />Nga hetimet e deritanishme ka dyshime të arsyeshme se shtetasi Eduart Sallaku është në krye të këtij grupi kriminal, në rolin e organizatorit të trafikimit drejt brindizit.<br /><br />Ditën e mërkurë, Eduart Sallaku, është afruar në këmbë pranë bregut të detit dhe ka hipur në skafin në pronësi të Lazër Lazrit. Të dy kanë pritur ardhjen e një tjetër skafi, të nisur nga Italia, në bordin e së cilit gjendeshin dy shtetasit italianë.<br /><br />Lazri është kontaktuar nga Vitor Brahja, me qëllim që të ndihmonte në transportimin e lëndës narkotike nga brendësia e pyllit për në bordin e skafit të tij dhe, më tej, ta transportonte në skafin e shtetasve italianë më në brendësi të detit.<br /><br />Për realizimin e qëllimit kriminal, Brahja ka kontaktuar me dy nipërit e tij Jurgen Brahja dhe Gjon Brahja, të cilët, përveç ndihmës në ngarkimin e lëndës narkotike, do të monitoronin dhe zonën përreth për të sinjalizuar më pas Eduart Sallakun për prezencën e forcave policore./tvklan.al
