Një atentat me eksploziv ndaj një personi dështoi paraditen e së shtunës në qendër të qytetit të Elbasanit. 300 gramë C4 u gjet poshtë një automjeti Golf 4. Ai u zbulua nga përdoruesi i makinës, pasi në momentin që hapi derën dëgjoi zhurmën e shpërthimit të kapsollës.<br /><br />Diçka nuk funksionoi dhe eksplozivi nuk shpërtheu.<br /><br />Me lajmërimin e policisë u bë menjëherë rrethimi zonës. Blutë krijuan një perimetër sigurie, duke bllokuar rrugën dhe larguar njerëzit deri në mbërritjen e specialistëve Antieksploziv nga kryeqyteti.<br /><br />Forcat Antieksploziv e çaktivizuan me shpërthim të kontrolluar lëndën plasëse. Eksplozivi ishte lidhur me një celular dhe sipas hetuesve tentativa për ta aktivizuar u bë në distancë.<br /><br />Grupi hetimor pritet të marrë në pyetje pronarin e mjetit, me inicialet F. V, por edhe persona të tjerë të cilët përdorin këtë makinë.<br /><br />Pas më shumë se dy orësh u kthye normaliteti në një nga zonat më të populluara në Elbasan.<br /><br />Tv Klan
