Ministria e Energjisë dhe Industrisë ka prishur kontratën me kompaninë "Hidro srl", për ndërtimin me koncesion të hidrocentralit të Kalivaçit. Kjo kompani që ka në zotërim 100% të aksioneve të firmës Kalivaci Green Energy, është në pronësi të italianit Francesco Becchetti.<br /><br />Kontrata e lidhur në vitin 1997 parashikonte ndërtimin e hidrocentralit mbi lumin Vjosë, ku pritej të investoheshin 150 milionë euro, por zvarritja e punimeve ka bërë që afatet të shtyhen disa herë.<br /><br />Të kontaktuar nga Televizioni Klan, zyrtarë të Ministrisë së Energjisë thonë se kontrata është prishur për shkak të shkeljes së saj nga ana e kontraktorit. Sipas tyre për këtë çështje janë vënë në dijeni edhe organet e hetimit.<br /><br />Të njëjtët zyrtarë thonë se punimet në Kalivaç kanë lënë kantierët hapur prej shumë kohësh.<br /><br />Për këtë arsye Autoritetet Shtetërore kanë vendsour që koncesionin ta japin të një tjetër kompanie.<br /><br />Dokumentetet e siguruara nga Televizioni Klan tregojnë se Ministria e Energjisë ka lajmëruar Agjencinë e Prokurimit Publik për të hapur edhe njëherë tenderin.<br /><br />Formula e koncesionit këtë herë do të jetë e formës partneritet publik-privat dhe do të zgjatë 35 vjet.<br /><br />Kompania që do të shprehë interesin për të vazhduar këtë vepër do të duhet të përputhë edhe njëherë në planin e fizibilitetit raportet me mjedisin, për shkak të impaktit që ka në florën dhe faunën ndërtimi i HEC -eve në Vjosë.<br /><br />Tv Klan
