Në vijim të një operacioni masiv që po zhvillohet në të gjithë territorin e qarkut Vlorë për parandalimin, evidentimin, goditjen e kultivimit dhe trafikimit të lëndëve narkotike, autoritetet kanë sekuestruar 140 kilogramë kanabis. Gjithashtu, janë zbuluar 70 bimë narkotike, si dhe dy gomone.<br /><br />Burime zyrtare sqarojnë se 4 janë personat e shoqëruar, me të cilët po punohet për zbardhjen e ngjarjeve.<br /><br />Kështu, gjatë kontrollit të ushtruar në fshatin Vergo të Delvinës, pranë vendit të quajtur "Shahino", midis disa shkurreve janë gjetur 6 thasë të mëdhenj sintetikë të mbushura me kanabis, me peshë të përgjithshme prej 140 kilogramë.<br /><br />Në vijim të këtyre kontrolleve janë evidentuar dhe asgjësuar 70 bimë narkotike po kanabis, në fshatin Gjormë të Selenicës, të mbjella në një zonë të pyllëzuar. Lartësia e tyre ishte nga 10 deri në 15 cm. Bimët u asgjësuan me djegie.<br /><br />Gjithashtu, gjatë kontrolleve të ushtruara përgjatë lumit Vjosë, autoritetet kanë konstatuar dhe bllokuar 2 gomone në fshatin Pish-Poro, të cilat dyshoheshin se ishin fshehur me qëllim për të trafikuar lëndë narkotike.<br /><br />Vazhdojnë hetimet për arrestimin e autorëve të implikuar në këto veprimtari kriminale.<br /><br />Policia e Vlorës bën me dije se në ditët në vijim do të ketë kontrolle të rrepta me grupe pune të mirëorganizuara, si dhe monitorimin e të gjithë territorit nga ajri, toka dhe uji me qëllim parandalimin e veprimtarive të paligjshme, si dhe marrjen e masave për ndëshkimin e personave përgjegjës.<br /><br />Në operacion janë përfshirë duke bashkëpunuar me njëra-tjetrën forca të shumta policie, konkretisht: Drejtoria Vendore e Policisë Vlorë, Drejtoria Vendore e Policisë Kufitare dhe Migracionit Vlorë, Reparti Delta Force, Njësia Speciale FNSH Fier dhe Guardia di Finanza./tvklan.al
