Rënia e temperaturave uli disi intensitetin e zjarreve, megjithatë situata vazhdon të jetë problematike në disa zona.<br /><br />Emergjencat Civile raportojnë se gjatë kësaj të shtune ka 8 vatra zjarri aktive në qarqet e Tiranës, Dibrës, Durrësit, Fierit, Vlorës e Gjirokastrës.<br /><br />Më problematike situata raportohet në Bashkinë Dropull, pikërisht në fshatrat Frashtan dhe Lugar, ku edhe pas ndërhyrjes së forcave zjarrfikëse dhe përfshirjes së 2 avionëve Canadair nga Greqia, nuk ka qenë e mundur të shuhen flakët e zjarreve.<br /><br />Edhe në fshatin Bularat rrezikohet një sipërfaqe e madhe pyjore.<br /><br />Edhe në Finiq zjarret kanë krijuar situatë të rëndë, pasi flakët i janë afruar shumë fshatit Dhrovjan ndërsa pritet ndërhyrja nga ajri.<br /><br />Në të gjitha këto zona janë përfshirë në operacionet e Emergjencave Civile dhe afro 100 forca të Ushtrisë, që po japin kontributin e tyre për të mos lejuar që zjarret të përfshijnë banesat.<br /><br />Emergjencat raportojnë dhe për një zjarr që ka përfshirë fshatin Cudhi në Krujë ku po rrezikohet Parku Kombëtar i Qafë Shtamës.<br /><br />Në mbrëmje Emergjencat raportuan për një zjarr masiv në fshatin Kreshpan të Patosit që ka përfshirë një zonë me ullinj, por që është larg banesave. Forcat zjarrfikëse po punojnë për izolimin e flakëve, megjithëse era po vështirëson punën e tyre duke përhapur flakët<br /><br />Tv Klan
