پەیامێك لە لاهور شێخ جەنگی لە سەكۆی ئازادەوە باسی نەوشیروان مستەفا و مام جەلال دەکا<br />"لاهور شێخ جه‌نگی" له سه‌كۆى ئازادى شارى سلێمانییه‌وه په‌یامێك ئاڕاسته‌ى خه‌ڵكى كوردستان ده‌كات و رایده‌گه‌یه‌نێت "ئه‌ركمان زۆر قورسه، چونكه دوو سه‌ركرده‌ی گه‌وره كه قه‌ڵا بوون بۆ كورد، مام جه‌لال و كاك نه‌وشیروانمان له‌ده‌ستداوه، ئه‌گه‌ر وریا نه‌بین پڕكردنه‌وه‌ی ئه‌و كه‌لێنه ئه‌سته‌م ده‌بێت و ئه‌ركه‌كانمان له به‌غدا قورس ده‌كات"، ئاماژه به‌وه‌شده‌كات "ده‌بێت هاوڵاتیانی هه‌رێمى كوردستان زۆر به وریایی ده‌نگ بده‌ن و ئه‌و كه‌سه هه‌ڵبژێرێن كه له به‌غدا مافه ده‌ستوریيه‌كانی هه‌رێم بگه‌ڕێنێته‌وه".<br /><br />ئه‌مڕۆ سێ شه‌ممه رێكه‌وتى 24 ى 4 ى 2018، به ئاماده‌بوونى "لاهور شێخ جه‌نگی" و ژماره‌یه‌ك له چین و توێژه جیاجیاكانى خه‌ڵكى شارى سلێمانى، ساڵیادى كردنه‌وه‌ى سه‌كۆى ئازاد كه به بڕیارى "سه‌رۆك مام جه‌لال" له پاركى ئازادى شارى سلێمانى كراوه‌ته‌وه، به‌ڕێوه‌چوو. <br /><br />له وته‌یه‌كدا بۆ ئاماده‌بووانى مه‌ڕاسیمى ساڵیادى كردنه‌وه‌ى سه‌كۆى ئازاد، "لاهور شێخ جه‌نگی" رایگه‌یاند "ئه‌م شوێنه تایبه‌تمه‌ندی خۆی هه‌یه، چونكه له‌لایه‌ن مامه‌وه كراوه‌ته‌وه".<br /><br />له په‌یامێكیشدا بۆ پارێزه‌رانى ژینگه، "لاهور شێخ جه‌نگی" ئاماژه‌ى به‌وه‌كرد "ئێمه ده‌ستخۆشی له ئێوه ده‌كه‌ین، درێژه‌پێده‌ری رێبازی ژینگه‌پارێزی مامن و پارێزگاری له سه‌وزایی شار و شارۆچكه‌كانی كوردستان ده‌كه‌ن و وه‌ك پێشمه‌رگه‌یه‌ك ئه‌ركه‌كه‌تان به‌جێده‌گه‌یه‌نن، ده‌ستی ماندووبوونتان ده‌گوشم".<br /><br />له‌باره‌ى هه‌ڵبژاردنى ئه‌نجومه‌نى نوێنه‌رانى عێراقیشه‌وه، "لاهور شێخ جه‌نگی" وتى "ئه‌ركمان زۆر قورسه، چونكه دوو سه‌ركرده‌ی گه‌وره كه قه‌ڵا بوون بۆ كورد هه‌ردوو سه‌ركرده مام جه‌لال و كاك نه‌وشیروانمان له‌ده‌ستداوه و ئه‌مه‌ش كه‌لێنێكی گه‌وره‌یه، ئه‌گه‌ر وریا نه‌بین پڕكردنه‌وه‌ی ئه‌و كه‌لێنه ئه‌سته‌م ده‌بێت و ئه‌ركه‌كانمان له به‌غدا قورس ده‌كات".<br /><br />"لاهور شێخ جه‌نگی" باسى له‌وه‌شكرد "هه‌موو هێزێك ناتوانێت ئه‌و ئه‌ركه بگرێته ئه‌ستۆی خۆی، بۆیه ده‌بێت هاوڵاتیانی هه‌رێمى كوردستان زۆر به وریایی ده‌نگ بده‌ن و ئه‌و كه‌سه هه‌ڵبژێرێن كه له به‌غدا مافه ده‌ستوریيه‌كانی هه‌رێم بگه‌ڕێنێته‌وه".<br /><br />له‌باره‌ى دامه‌زراندنى ئه‌و كارمه‌ندانه‌ى كه هه‌تا ئێستا به‌شێوه‌ى گرێبه‌ست كارده‌كه‌ن، "لاهور شێخ جه‌نگی" ئه‌وه‌ى خسته‌ڕوو "ئێمه ناوه‌كانیان وه‌رده‌گرین و له‌گه‌ڵ حكومه‌ت شه‌ڕی گه‌وره ده‌كه‌ین بۆ دامه‌زراندنیان به فه‌رمى".
