Tre vogëlushë, të cilët erdhën në jetë të njëjtën ditë, u shuan këtë të mërkurë në Romanat të Durrësit.<br /><br />Trinjakët e Migena dhe Gëzim Konçit ndodheshin të vetëm në banesë, kur kjo e fundit u përfshi nga flakët.<br /><br />Babai i tyre ishte në punë, ndërsa e ëma 30 - vjeçare sëbashku me dy vajzat më të rritura kishte shkuar tek nëna e saj.<br /><br />Tre të vegjlit dyshohet se mund të kenë qenë duke luajtur me shkrepëse dhe ky mund të jetë edhe shkaku i zjarrit.<br /><br />Gazetarë e kamera të shumta shkuan në shtëpinë Konçi, pasi ngjarja e rëndë tronditi mbarë opinionin publik.<br /><br />Të afërmit refuzuan të flisnin, ndërsa në ambientet e shtëpisë, fqinj të shumtë kishin pak fjalë, pasi tronditja ishte tepër e madhe.<br /><br />Një prej tyre, rrëfeu se kishte vrapuar menjëherë drejt shtëpisë kur kishte dëgjuar ulërimat.<br /><br />Ai tregoi se kishte dëgjuar edhe të vegjëlit, që të dëshpëruar ulërinin brenda dhomës së mbyllur me çelës.<br /><br />"I njoh shumë mirë si familje, janë familje shumë e mirë. Unë nuk kam parë gjë, por kam dëgjuar vetëm të bërtiturat sepse ka nisur të dalë tym dhe njerëzit kanë filluar të bërtasin.<br /><br />Janë pesë fëmijë. Nuk e di ku kanë qenë prindërit, unë kam parë vetëm zjarrin dhe kam njoftuar zjarrfikësen. Kam dëgjuar ulërimat e fëmijëve dhe mënjëherë jam nisur nga puna dhe kam ardhur këtu."<br /><br />Pavarësisht përpjekjeve për t'i nxjerrë ata jashtë dhomës ku ndodheshin, hekurat e dritare dhe flakët e mëdha e bënë të pamundur.<br /><br />Tre vogëlushët, të cilët nëna e tyre Migena në rrjete sociale i quante "dashuri e trefishtë", nuk mundën të mbijetonin.<br /><br />Pamjet pas zjarrit të tmerrshëm tregojnë orenditë e shtëpisë të shkrumbuara, ndërsa ajo që mbetet është dhimbja e familjes që nuk ka fjalë për t'u përshkruar./tvklan.al
