Qeveria do të fillojë mbështetjen e investimeve në fushën e prodhimit të energjisë elektrike për kompanitë që do të financojnë mbi 100 milionë Euro. Këshilli i Ministrave ka miratuar ndryshimet në ligjin për konçesionet dhe partneritetin publik-privat, ku i lihet në dorë këtij organi hartimi i akteve dhe procedurave për dhënien me koncesion të hidrocentraleve dhe termocentraleve private.<br /><br />Televizioni Klan ka mësuar se deri tani kanë qenë disa investitorë të cilët janë të interesuar për të ndërtuar vepra energjetike, por koha për miratimin e kontratës, e cila zgjat deri në dy vjet i ka stepur ata. Për këtë qëllim, Ministria e Infrastrukturës dhe Energjisë do të hartojë një vendim të veçantë i cili do të shkurtojë kohën e dhënies së koncesioneve në fushën HEC-eve dhe termocentraleve.<br /><br />Në relacionin që shoqëron ndryshimet në këtë ligj, formula e koncesioneve nuk përjashton edhe mbështetjen buxhetore në raste të caktuara, por për këtë pikë Ministria e Financave ka kërkuar që çdo projekt të kalojë më parë në shqyrtim nga ajo për efektin që do të ketë në financat publike.<br /><br />Në relacion, qeveria shpreh qartë synimin për të vijuar ndërtimin e hidrocentraleve deri në momentin që vendi ynë do të arrijë të plotësojë vetë nevojat për konsumin e energjisë. Relacioni shpreh qartë synimin e qeverisë e cila do të vijojë të mbështetë ndërtimin e veprave në fushën e energjisë. Që prej vitit 1999 Shqipëria vijon të jetë importues neto i energjisë elektrike.<br /><br />Tv Klan
