Zëvendësimi i palmave me pisha të buta përgjatë autostradës Tiranë-Durrës, ishte në fokus të debatit në emisionin "Repolitix" në Report Tv. <br /><br />Këshilltari socialist, Florian Pullazi, i cili një ditë më parë u emërua administrator i njësisë bashkiake nr.2, tha se projektvendimi u diskutua gjerësisht në grupin e këshilltarëve të majtë. Duke mbrojtur mbjelljen e pishave në vend të palmave, ai tha se Tirana duhet të ketë një hyrje dinjitoze nga pikëpamja vizuale. <br /><br />"Kërkohet një hyrje sa më dinjitoze, për t'i dhënë nga ana vizuale një sistemim tjetër të asaj hyrje të kryeqytetit. Kur je në grup, merret vendimi i të gjithëve. Këshilltarët e votuan dhe dhanë votën pro", tha Pullazi.<br /><br />Por kundër këtij vendimi të Bashkisë së Tiranës, u shpreh këshilltari demokrat, Leonard Olli, i cili tha se e gjitha është në vazhdën e skandaleve dhe abuzimeve financiare. Sipas tij, palmat kanë kushtuar 5 milionë euro dhe askush nuk mban përgjegjësi për tharjen dhe nxjerrjen e tyre jashtë funksionit. Olli shtoi gjithashtu se me 2.5 milionë euro për mbjelljen e pishave, mund të ishin ndërtuar disa shkolla apo dhe qendra për fëmijët e rrugës e të moshuarit.
