Mosrespektimi i rregullave të qarkullimit rrugor nga këmbësorët është bërë shpesh burim aksidenti. Pasditen e së premtes një kalimtare e cila nuk kalonte në vijat e bardha u përplas për vdekje nga një automjet.<br /><br />Këto pamje ku kalimtarë të shumtë nuk kalojnë tek vijat e bardha, por në mes të rrugës hasen çdo ditë në rrugët e kryeqytetit.<br /><br />Edhe pse të ndërgjegjshëm për rrezikun, këmbësorët zgjedhin të kalojnë mes për mes automjeteve, ndonëse vijat e bardha janë disa metra më tutje.<br /><br />Jo vetëm të moshuarit nuk respektojnë rregullat dhe sinjalistikën, por edhe të rinjtë.<br /><br />Referuar edhe të dhënave të INSTAT vetëm gjatë një muaji janë regjistruar rreth 200 aksidente dhe rreth 1600 të tilla në të gjithë vendin nga shkelja e rregullave të qarkullimit. Në 300 raste shkak të aksidenteve kanë qenë këmbësorët, ku 37 prej tyre kanë humbur jetën nga Janari deri në Tetor.
