"Viti 2018 përbën një mundësi unike për përparimin e vendeve të Ballkanit në rrugën e integrimit në Bashkimin Evropian" Kjo ka qenë kryefjala e darkës së punës që përfaqësuesja e lartë për punët e jashtme dhe politikës së sigurisë së Bashkimit Europian, Federica Mogherini ka artikuluar me 6 kryeministrat e Ballkanit Perëndimor të ftuar në Bruksel.<br /><br />Mogherini është përkujdesur t'a kalojë këtë mesazh gjatë bilateraleve të shkurtra që ajo ka zhvilluar me çdo kryeministër të Ballkanit.<br /><br />Në takimin me kryeministrin shqiptar Edi Rama, Mogherini ka treguar gatishmërinë e Komisionit Europian për një rekomandim për hapjen e negociatave të anëtarësimit në BE në 2018, duke theksuar se nevojiten rezultate të mëtejshme konkrete në reformat kyçe që ky predizpozim të kthehet në realitet.<br /><br />Viti 2018 është viti i fundit i mandatit të Komisionit Juncker, ndaj ekzekutivi europian synon të bëjë maksimumin për t'i dhënë stimul procesit të integrimit të rajonit. Për Serbinë, një kusht i pandashëm i BE-së mbeten edhe bisedimet Prishtinë-Beograd. Edhe kryeministrit të Kosovës, Ramush Haradinaj i është përcjellë po ky mesazh për bisedimet me Beogradin me shpresën që qeveria e Kosovës të mund tê ratifikojë marrëveshjen e demarkacionit me Malin e Zi në fund tê vitit për të bërë realitet liberalizimin e vizave për qytetarët e saj.
