Një bankë e nivelit të dytë është grabitur në qytetin e Laçit, pasditen e kësaj të premteje. Nga informacionet paraprake, policia bën me dije se banka është grabitur nga persona të maskuar dhe të armatosur.<br /><br />Ngjarja ka ndodhur këtë pasdite, ndërsa policia ka mbërritur në vendngjarje dhe ka nisur menjëherë hetimet, për të identifikuar dhe kapur autorët, si dhe për të zbuluar shumën e marrë, e cila nuk dihet ende. <br />Report Tv mësoi se në momentin kur ka ndodhur grabitja Policia e Kurbinit ka qenë në festën e fundvitit. Ndërsa, bëhet e ditur se është grabitur banka në qendër të qytetit të Laçit, në momentin e përpunimit të parave nga punonjësit e bankës. Sipas uniformave blu, autorët e maskuar dhe nën kërcënimin e armës kanë thyer xhamin e njësisë së bankës dhe kanë marrë një shumë parash.<br /><br />Mësohet se grabitësit kanë kërcënuar me armë rojen e bankës dhe janë futur brenda. Ka qenë alarmi i bankës që ka vënë menjëherë në lëvizje policinë. Megjithatë, autorët kanë vepruar me shpejtësi, duke marrë sasinë e parave dhe duke u larguar para se të mbërrinin forcat policore.
