Pas afro 3 vjetësh në krye të policisë, Haki Çako u shkarkua nga detyra e Drejtorit të Pergjithshëm.<br />Këshilli i Ministrave e mori vendimin këtë të hënë, me kërkesë të ministrit të Brendshëm, Fatmir Xhafaj.<br />Ministria e Brendshme njoftoi lirimin nga detyra pas një takimi që Çako pati me ministrin Xhafaj në zyrën e këtij të fundit gjatë paradites të së hënës.<br />Në njoftim vlerësohet puna dhe përkushtimi i Çakos në krye të Policisë së Shtetit, për të cilin thuhet se drejtoi me profesionalizëm struktura të niveleve të ndryshme.<br />Por sipas Ministrisë së Brendshme, realizimi i objektivave të këtij mandati qeverisës, në fushën e rendit dhe sigurisë publike, kërkojnë një ritëm më të shpejtë dhe dinamikë të madhe pune. Për këtë arsye është i domosdoshëm një lidership i ri, me energjitë të reja për të motivuar dhe çuar përpara punën e Policisë së Shtetit.<br />Në njoftim theksohet po ashtu se puna e policisë, domosdoshmërisht duhet të jetë e orientuar drejt rezultateve konkrete, me qëllim që t?u përgjigjet më mirë kërkesave të kësaj faze të re dhe pritshmërive të larta të publikut dhe partnerëve ndërkombëtarë ndaj Policisë së Shtetit.<br />Haki Çako qëndronte në krye të uniformave blu që prej Prillit të vitit 2015, kur mori drejtimin e policisë pas dorëheqjes së Artan Didit. Përpara se të emërohej në këtë detyrë, ai kishte mbajtur edhe funksionin e zv/ drejtorit të Përgjithshëm të Policisë. Po ashtu Çako, drejtoi Policinë e Gjirokastrës gjatë vitit 2013- 2014, kohë në të cilën edhe u zhvillua operacion anti-kanabis në Lazarat.
