Aksioni për kontrollin e lidhjeve të paligjshme do të nisë derë më derë në datën 1 Shkurt. Në një intervistë për televizionin Klan, Lindita Sotiri, këshilltare në Minsitrinë e Infrastrukturës dhe Energjisë për çështjet e ujit, thotë se nuk do të ketë kthim mbrapa dhe të gjithë abonentët të cilët gjenden pa matësa dhe pa kontrata me ndërmarrjet e ujësjellësit nuk do të furnizohen me ujë. Në rastin se konstatohet ndërhyrje e paligjshme në rrjet, atëherë abonenti do të kallëzohet penalisht.<br /><br />Lindita Sotiri: "Në 1 Shkurt kontrollet do të jenë derë më derë, nëse ka lidhje të paligjshme sanksionet janë sipas parashikimeve që ka ligji, ndjekje penale".<br /><br />Sotiri thotë se situata e borxheve në sektorin e ujësjellësit është e tillë edhe për faj të keqmenaxhimit të këtyre ndërmarrjeve. Për këtë arsye qeveria do të japë mbështetje financiare për ujësjellësat vetëm nëse ato rritin arkëtimet, e në momentin që nuk përmbushin kriteret, menaxhimin e tyre do ta marrë pushteti qëndror.<br /><br />"Jemi duke bërë gati edhe ndërhyrjet ligjore, ku nëse kompanitë e ujësjellësave nuk arrijnë të përmbushin kriteret e performancës ne nuk do t?i japim më mbështetje financiare, e në këtë rast nuk mund të lemë qytetarët pa këtë shërbim dhe do t?i kalojmë në administrim të pushtetit qëndror".<br /><br />Aksioni do të përfshijë edhe institucionet publike të cilat nuk paguajnë ujin, apo nuk kanë një kontratë me ujësjellësin.<br /><br />"Ka bashki që nuk kanë kontratë, dhe pastaj do të shtrihet edhe te punonjësit e administratës".<br /><br />Borxhet që kanë kompanitë e ujësjellësit kapin vlerën e 80 milionë Dollarëve, ndërsa niveli i humbjeve në këtë sektor është dy herë më i lartë se ai në sektorin e energjisë, vetëm 33% e ujit të hedhur në rrjet faturohet te abonenti.<br /><br />Tv Klan
