Në ceremoninë e përkujtimit të 7-vjetorit të 21 janarit 2011, vajza e Ziver Veizit, Ana Veizi ka kërkuar drejtësi për babain e saj, i cili u vra në protestën e opozitës përpara Kryeministrisë. <br /><br />Në një kohë kur asnjë prej zinxhirit komandues të Gardës së Republikës dhe efektivëve të "Grupit të Zjarrit" nuk është dënuar, Ana Veizi kërkon nxjerrjen përpara ligjit nga drejtësia e re të urdhëruesve dhe vrasësve të babait të saj dhe 3 protestuesve të tjerë. <br /><br />"Nuk kam ardhur këtu me një fjalim të shkruar, por përgatita diçka rrugës kur po vija në Tiranë. Drejtësia e re të na japë mundësinë e hapjes së dosjes së 21 janarit, ku të ndëshkohen urdhëruesit dhe vrasësit", u shpreh Ana Veizi, vajza e Ziver Veizit. Në 7 vjetorin e të premtes tragjike të 21 janarit 2011, kryeministri Edi Rama priti në Kryeministri familjarë dhe të afërm të viktimave. <br /><br />Kreu i qeverisë theksoi se drejtësia dështoi të bëjë drejtësi për këtë ngjarje të rëndë autorët e të cilës janë ende të padënuar dhe ngjarja mbetet e pazbardhur.
