Në përfundim të afatit të aplikimit, Presidenti ka bërë publike listat me kandidatët e interesuar për të plotesuar dy vendet vakante në Gjykatën Kushtetuese.<br /><br />Në listën e parë janë renditur 22 emra ndërsa në të dytën 16, por që të gjithë kandidatët janë edhe në listën e parë.<br /><br />Ndër emrat që bien në sy janë ato të ish-Prokurorit të Përgjithshëm Theodhori Sollaku, nënkryetarit aktual të KQZ Denar Biba, ish-drejtoresha e Marrëdhënieve me Jashtë në Prokurorinë e Përgjithshme Rovena Gashi, që aktualisht është anëtare e Këshillit të Emërimeve në Drejtësi, apo ish-kandidati për Prokuror të Përgjithshëm të përkohshëm Besnik Muçi.<br /><br />Emra të tjerë të njohur janë Ilir Panda apo Kristaq Traja. Emrat e bëra publik nga presidenti kalojnë në sitën e Këshillit të Emërimeve në Drejtësi.<br /><br />Ata hartojnë një listë, sipas një renditje nga kandidati më i vlerësuar tek ata më pak të vlerësuar. Nga kjo listë Presidenti ka të drejtë të përzgjedhë duke emëruar dy anëtarë në Gjykatën Kushtetuese pas vakancave të krijuara nga përfundimi i mandatit të Sokol Berberit dhe dorëheqjes së anëtarit tjetër Besnik Imeraj.<br /><br />Ndërkohë edhe kuvendi ka shpallur vakancën për një anëtar të kësaj gjykate që ka të drejtë ta përzgjedhë parlamenti, por edhe pse afati i aplikimit është data 15 mars, deri tani sipas burimeve nga ky institucion bëjnë të ditur se ka aplikuar vetëm një kandidat.<br /><br />Pas ndryshimeve kushtetuese të 2016, 9 anëtaret e Gjykatës Kushtetuese zgjidhen 3 nga Presidenti, 3 nga Kuvendi dhe 3 të tjerë nga radhët e Gjykatës së Lartë. Të gjitha kandidaturat shqyrtohen nga Këshilli i Emërimeve në Drejtësi.
