Ky është momenti kur policia greke kontrollon me imtësi motobarkën me të cilën Dritan Jorgji nga Saranda transportoi drejt Igumenicës ngarkesën me 424 kilogramë kanabis mbrëmjen e së mërkurës.<br /><br />Është ora 2 pas mesnate në plazhin e Platarias, aty ku 42-vjeçari shqiptar kishte lënë takim me blerësin e drogës, i cili në fakt rezultoi të ishte një agjent i policisë së Prevezës.<br /><br />Në krah të mjetit lundrues ku ishte ngarkuar droga qëndron një nga 6 fregatat e rojes bregdetare greke, të përfshira në operacion.<br /><br />Në video dëgjohet sesi efektivët pyesin për llojin e motorit dhe përpiqen të dallojnë çfarë shkruhet me ndihmën e prozhektorëve dhe elektrikëve të dorës. <br /><br />Forcat greke ndërhynë në momentin që 42-vjeçari lidhi gomonen dhe po shkarkonte drogën pa e ditur se kishte rënë pre e një kurthi.<br /><br />Ai ishte mbajtur nën vëzhgim sapo kishte kaluar në ujërat greke, ku po lëvizte me shumë kujdes dhe fare afër bregut, në mënyrë që të mos zbulohej nga radarët. Shqiptari që u vu në pranga dyshohet se transportonte sistematikisht drogë nga Shqipëria në Greqi përmes detit.
