Situata në zonën e përmbytur në Shkodër vazhdon të jetë e rënduar ndaj Ministria e Mbrojtjes ka shtuar forcat operacionale dhe mjetet në ndihmë të banorëve. Përveç forcave operacionale aty ka mbërritur dhe një grup i batalionit komando në ndihmë të banorëve.<br /><br />Siç raporton Bashkia, gjatë natës janë rrëzuar disa shtylla elektrike, për shkak se prej ditësh janë të mbuluara nga uji dhe për rrjedhojë fshatra të tëra janë pa energji elektrike.<br /><br />Sipërfaqja e përmbytur vazhdon të jetë rreth pesë mijë hektarë tokë dhe 400 shtëpia janë të rrethuara nga uji. Ministria e Mbrojtjes raporton se gjatë natës janë vendosur mbi 2 mijë thasë me rërë në argjinaturën e Pentarit.<br /><br />Rrugët Shirq-Darragjat, Belaj-Pentar, Bishti i Qarrit dhe Urrela janë të bllokuara. Në disa shkolla, në ambientet e brendshme ka prezencë uji.<br /><br />Kurse në qytetin e Shkodrës në zonën e Livadheve ndodhen mbi 70 shtëpi me prezencë uji afër oborreve të tyre. Në Anën e Malit ujësjellësit janë jashtë funksionit dhe banorët kanë nevoja urgjente për furnizimin me ujë të pijshëm.<br /><br />Një lagje në Obot është plotësisht e bllokuar. Në Bërdicë gjithashtu janë shtuar problemet. Në rrugën nacionale ka dalë uji dhe kërkohet ndërhyrje. Situatë ka edhe në Guri të Zi dhe në Velipojë.<br /><br />Me shumë vështirësi kalohet dhe me makinë ushtrie, ndërsa në disa zona kalimi bëhet i mundur vetëm me varkë.
