Miratimi i Demarkacionit nga ana e parlamentit të Kosovës ishte një mundësi shumë e mirë për afirmimin e shtetit të Kosovës, por edhe një hap drejt liberalizimit të vizave.<br /><br />I këtij mendimi është eksperti i çështjeve ndërkombëtare, Enver Bytyçi, i cili thotë se, impaktet e miratimit të marëveshjes me Malin e Zi do jenë pozitive.<br /><br />Enver Bytyçi: Impakti pozitiv i këtij vendimi ka të bëjë me liberalizimin e vizave. Besoj dhe shpresoj që në vjeshtën e këtij viti shqiptarët e Kosovës të lëvizin pa viza në shtetet Shengen të Bashkimit Europian. Përcaktimi i kufinjve mes Kosovës dhe Malit të Zi është afirmim i shtetësisë dhe pavarësisë së Kosovës.<br /><br />Por, për një tjetër njohës po aq të mirë të realitetit në Kosovë, Gëzim Podgorica, miratimi i kësaj marëveshje nuk çon automatikisht në liberalizimin e vizave, pasi Kosova duhet të luftojë sidomos korrupsionin.<br /><br />Gëzim Podgorica: Miratimi i Demarkacionit nuk do të thotë automatikisht heqje e vizave. Fatkeqësisht është abuzuar me këtë. Kosova ka një tjetër detyrë shumë të rëndësishme, që është lufta kundër korrupsionit.<br /><br />Megjithatë, Bytyçi dhe Podgorica bashkohen në një pikë, që institucionet dhe politika kosovare duhet të jenë më të përgjegjshme në marrëveshjet që nënshkruajnë apo ratifikojnë, sidomos sa i përket shënjimit të vijës kufitare me Maqedoninë dhe Serbinë.<br /><br />Gëzim Podgorica: Një hap i rëndësishëm u krye, shumë i vonuar dhe që prodhoi më shumë politikë seç ishte dhe çfarë konsumon Kosova. Politikanët e Kosovës duhet të jenë më të përgjegjshëm, duhet të reagojnë me maturi dhe duhet ta menaxhojnë më mirë dhe me racionalitet gjithë veprimin e tyre politik, që të mos përsërisin situata të tilla me çështjen e Demarkacionit.<br /><br />Enver Bytyçi: Ky duhet të bëhet mësim, që në çdo vendimmarrje apo marrëveshje, të shkohet mbi bazën e ekspetizës, mbi bazën e konsultimit të gjerë, politike transparente me qëellim që vendimmarja të jetë e drejtë, e arsyeshme dhe kudnërsthitët të mos jenë në këtë shkallë siç ishin në rastin e demarkacionit me Malin e Zi.<br /><br />Miratimi i Demarkacionit me Malin e Zi u kthye në një problem më shumë se 2-vjeçar për Kosovën, pasi palët politike debatuan dhe u konfliktuan, deri në rrëzimin e një qeverie.<br /><br />Banorët e Kosovës janë të ndarë në dy qëndrime, pro dhe kundër, kësaj marrëveshje, e cila u nënshkrua në vitin 2015 nga Hashim Thaçi dhe homologu i tij malazez, Bujanoviç.<br /><br />Miratimi i marrëveshjes me malin e Zi është hapi i parë drejt shënjimit të kufirit të Kosovës, që do vijojë me Maqedoninë dhe Serbinë, çka pritet të jetë akoma më i vështirë se me Malin e Zi.
