Urdhri për dëbimin e dy diplomatëve shqiptarë, Albert Jerasi dhe Arben Doçi nga ambasada jonë në Moskë, ka futur në kolaps punën e saj.<br /><br />Përfaqësia jonë në Rusi përbëhej në total nga 3 vetë, pikërisht nga dy diplomatët Jerasi dhe Doçi dhe nga ambasadori Arben Gazioni. Ky i fundit mbetet tashmë i vetmi përfaqësues i diplomacisë shqiptare në Rusi, pas shpalljes non-grata të dy diplomatëve, të cilët kanë 1 javë kohë për t?u kthyer në Shqipëri.<br /><br />Albert Jerasi dhe Arben Doçi janë të dy diplomatë karriere. Jerasi mbante detyrën e zv/ambasadorit shqiptar në Rusi. Ai ndodhej në Moskë prej më shumë se tre vjetësh, ndërsa më herët kishte shërbyer në misionin shqiptar pranë OKB në Nju Jork.<br /><br />Arben Doçi kishte një përvojë të gjatë në Rusi, e nisur që në vitin 1993. Ai mbante detyrën e këshilltarit të ambasadorit Gazioni dhe të sekretarit të ambasadës.<br /><br />Ndërkohë fushata e dëbimit të diplomatëve të huaj nga Moska nuk ka të ndalur. Pas përjashtimit të 150 zyrtarëve, 60 prej tyre amerikanë, Ministria e Jashtme ruse njoftoi Britaninë e Madhe se duhet të largojë të paktën edhe 27 diplomatë të tjerë, duke e çuar numrin total të britanikëve të dëbuar në mbi 50.
