Përveç negociatave që është duke bërë grupi i ngritur me urdhër të Kryeministrit me koncesionarin e Rrugës së Kombit, ka nisur puna në terren për monitorimin e lëvizjeve të automjeteve që kalojnë në tunelin e Thirrës.<br /><br />Burime konfidenciale thonë për televizionin Klan se përmes numërimit të makinave që përdorin këtë rrugë, do të krijohen të dhënat e nevojshme për të bërë më pas uljen e tarifës duke patur numra konkretë të lëvizjes së automjeteve.<br /><br />Të njëjtat burime bëjnë me dije se negociatat pritet të zgjasin afro dy muaj, kohë gjatë të cilës stacioni i pagesës nuk do të funksionojë.<br /><br />Një nga skenarët që po diskutohet është ai i uljes se çmimit të biletës nga koncesionari, siç e ka në kontratë dhe nxjerrja e aboneve për banorët e zonës, të cilët do të përfitojnë zbritje edhe si përdorues të shpeshtë, e po ashtu edhe buxheti i shtetit do të japë fonde për firmën koncesionare për të subvencionuar këtë shtresë.<br /><br />Një tjetër variant që ndodhet në tavolinën e negociatave është edhe vendosja e tarifës në bazë të kilometrave që bën një automjet në këtë aks. Por ky është një nga versionet më pak të mundshme për t?u realizuar, thone burimet.<br /><br />Nga ana tjetër, të njëjtat burime hedhin poshtë propozimet e disa prej deputetëve të mazhorancës për të bërë 0 taksën për banorët përgjatë kësaj zone. Ky opsion, sipas tyre, është i pamundur pasi do të rriste evazionin nga automjetet e Kosovës, të cilat mund të regjistrohen në Shqipëri, përkatësisht në Kukës.
