Pas ndeshjen me Partizanin, për Skënderbeun java e ardhshme do të rezervojë një tjetër sfidë interesante, ku bëhet fjalë për përballjen me kampionët në fuqi të Kukësit, kësaj radhe në Korçë.<br /><br />Ky takim ishte planifikuar të zhvillohej ditën e premte, megjithatë pritet të ketë një ndryshim të programit, për shkak të përballjes me Komisionin e Apelit në UEFA.<br /><br />Të enjten zyrtarët e klubit të Skënderbeut do të jenë në zyrat qendrore të UEFA-s në Zvicër përballë komisionit të Apelit, aty ku ky organizëm pritet të marrë një vendim rreth dënimit 10-vjeçar që qeveria europiane e futbollit i imponoi klubit shqiptar më 29 mars.<br /><br />Disa nga lojtarët e Skënderbeut mund të kryejnë lidhje direkte nga qyteti i Korçës me anëtarët e komisionit të Apelit për t?iu përgjigjur pyetjeve që mund t?iu parashtrohen.<br /><br />Duke parë që klubi bardhekuq një ditë përpara ndeshjes do ketë këtë impenjim shumë të rëndësishëm, ekziston mundësia që Federata Shqiptare e Futbollit, në dakordësi edhe me Kukësin, ta spostojë këtë supersfidë për ditën e hënë.<br />Nuk pritet ndonjë ndryshim nga vendimi i parë, ku Skënderbeu u dënua 10 vjet në kupat e Evropës dhe me 1 milion euro gjobë. Beteja e vërtet ligjore për Skënderbeun nis në CAS, aty ku drejtuesit e klubit korçar do të kërkojnë pafajësinë.
