Presidenti i Republikës, Ilir Meta, mori pjesë sot në Samitin e radhës së Krerëve të Shteteve të Procesit të Brdo-Brijuit, që u zhvillua në Shkup të Maqedonisë. Të ftuar të veçantë në këtë Samit ishin Presidenti i Këshillit Evropian, Donald Tusk, si dhe Kryeministri i Bullgarisë, Boyko Borisov.<br /><br />Në fjalën e tij, Presidenti Meta vlerësoi ndër të tjera se, së bashku kemi shfrytëzuar çdo moment për t?u angazhuar në një dialog të drejtpërdrejtë, megjithëqë jo gjithmonë kemi rënë dakord.<br /><br />Duke iu referuar ambicies së përbashkët të integrimit evropian për krijimin e një klime të besimit reciprok dhe të mirëkuptimit, Presidenti Meta, theksoi gjithashtu se, fatkeqësisht, në muajt e fundit kemi parë kthim mbrapa te retorikat dhe veprimet provokuese, të cilat sidoqoftë kanë qenë të izoluara.<br /><br />Kreu i Shtetit shprehu mbështetjen e ambicies për integrimin në NATO për të gjitha vendet e rajonit që e aspirojnë dhe nënvizoi se anëtarësimi i Shqipërisë në Aleancën Transatlantike nuk është kundër ndonjë vendi tjetër në rajon, por për të forcuar arkitekturën e sigurisë së rajonit, që ende është i paqëndrueshëm.
