Eduard Selami ka shpërthyer në akuza ndaj Lulzim Bashës në Kuvendin Kombëtar të PD. Ish-rivali i Bashës për kryetar të PD tha se në PD po rikthehet 95-a, ajo që sipas tij solli shkatërrimin më pas.<br /><br />Mes vërshëllimave të mbështetësve të Lulzim Bashës, Selami i kërkoi kryedemokratit të tërheqë statutin dhe të bëjë analizë për tre humbjet e fundit të demokratëve. Sipas tij, statuti i jep Bashës pushtet të pakufizuar, pasi ai mund të shkarkojë këdo që mban qëndrime, apo del kundër kryetarit, pa pasur pengesa statutore.<br /><br />PD s'ka pasur problem statutin. Duhet të bënim një analizë të thellë për rezultatin e humbjes, janë tre humbje rresht. Por nga viti 1995 kemi probleme me demokracinë e brendshme, me respektimin e anëtarëve, me respektimin e statutit.<br /><br />Fatkeqësisht statuti po kthehet në problemin tonë. Kryetari do të zgjedhë, sërish do të kemi listat e kryetarit. Statuti e kthen partinë në funksion të kryetarit.<br /><br />Më vjen keq që në statut përmendet disa herë fjala përjashtim. Hapeni Partinë Demokratike, bëni analizën e zgjedhjeve, keni humbur dy palë zgjedhje, tërhiq draft-statutin, pasi është më i keqi në gjithë historinë e PD-së.<br /><br />Kjo është qeverisja më e keqe në historinë e PD-së, por ne nuk ngjallim shpresë. Ky është statuti më i keq që ka pasur ndonjëherë PD. Në 95 kërkuat ikjen time, dhe vajti aty ku vajti Shqipëria. Ky statut e ka kthyer PD-në në shërbim të një njeriu.<br /><br />Z.Basha, lidershipi është vizion, është vlerë. Ky është statuti i përjashtimit, shikoni nenin 47 dhe 45. Basha shkarkoi 24 kryetarë degësh, e morën vesh nga televizioni ata, u shkel statuti. Tani e ka me statut, i shkrin kur do. Z.Basha tërhiqe këtë statut, bëj analizën e humbjeve, ke dy humbje rresht. <br /><br />Eduard Selami, ish-deputet i PD
