Ky është Xhafer Osmani, 61-vjeçari nga Pestova e Vushtrisë, i cili dyshohet se është personi që u shkrumbua brenda një makine të premten në afërsi të fshatit Borizanë, Fushë-Krujë. Dy ditë pas ngjarjes, policia dhe prokuroria e Krujës, kanë marrë deklarimet e pjesëtarëve të familjes. Ata i kanë konfirmuar hetuesve se makina, e cila u gjet e djegur ishte e 61-vjeçarit. Por pritet përgjigja e ADN-së, për të konfirmuar që trupi i djegur i përket atij.<br /><br />Zëdhënësi i Policisë për rajonin e Mitrovicës, Avni Zahiti u ka thënë mediave vendase se më 4 Maj, familjarët e kanë raportuar si të zhdukur Osmanin.<br /><br />Kurse burime të Policisë Shqiptare treguan se ai ka hyrë bashkë me mjetin e tij nga Morina, më 29 Prill. Për disa ditë me radhë ai nuk u ishte përgjigjur thirrjeve telefonike të familjarëve.<br /><br />Të njëjtin fakt familjarët ua përsëritën hetuesve të policisë në Krujë. I fundit që ka kontaktuar me Osmanin ka qenë një prej nipërve të tij. Ai ka pohuar se xhaxhai i kishte thënë se do të ikte në Shqipëri vetëm, pasi kishte disa punë për të mbaruar.<br /><br />Ka dyshime që burri mund të jetë ekzekutuar pak pasi ka hyre në Shqipëri dhe më pas makina bashkë me trupin e tij u dërguan në vendin ku dhe i është vënë flaka.<br /><br />Dyshimet e para ishin për një hakmarrje nga ish-miqtë e kosovarit në Fushë-Krujë. Por verifikimet e kryera i kanë hedhur poshtë këto dyshime.<br /><br />Një zyrtar i policisë i tha Televizionit Klan, që vendasit e njihnin Osmanin si pronar të një lokali me muzikë, në të cilin punojnë dhe vajza nga zona ku u gjet makina e djegur. Në vendin ku u gjet makina ka ende mbetje kockash, siç shikoni dhe nga pamjet, ndërsa makina është larguar nga policia.<br /><br />Tv Klan
