Përpara se të marrë një vendim nëse do të mbështesë apo jo çeljen e negociatave të Shqipërisë në Këshillin Europian, Holanda do të bindet nëse vendi ynë e meriton këtë hap të radhës në procesin e integrimit. Pikërisht për këtë arsye, 8 deputetë të shtatë partive të ndryshme të Parlamentit holandez kanë nisur këtë të hënë një mision faktmbledhës 2 ditor.<br /><br />Vizitën e kanë nisur me një takim me ministrin e Jashtëm Bushati. Më pas gjatë paradites janë pritur ne Kryeministri nga kreu i qeverisë Edi Rama, ndërsa në një drekë pune kanë patur mundësi të takohen dhe me kreun e opozitës Lulzim Basha si dhe me anëtarët e komisioneve parlamentare të Jashtëm dhe të Integrimit. Vetë deputetët në përfundim të këtyre takimeve që do të vijnë dhe me Presidentin dhe kreun e Kuvendit, thonë se qeveria holandeze është ekstremisht hezituese dhe se nuk mjafton vetëm ajo që është bërë pasi sipas tyre zyrtarët e korruptuar të çdo niveli duhet të hetohen dhe dënohen nga drejtësia.<br /><br />"Është bërë një propozim nga Komisioni Europian dhe për çeljen e negociatave dhe për këtë qeveria jonë e ka tashmë pozicionin e saj të shprehur dy javë më parë. Qeveria jonë është ekstremisht hezituese për hapjen e negociatave me Shqipërinë këtë moment. Prandaj ne si parlament vendosëm të organizojmë këtë mision faktmbledhës me anëtarë të 7 partive të ndryshme politike holandeze, pra të gjitha partitë kryesore janë këtu. Më pas ne do te kemi një debat se si po shkon zbatimi 5 prioriteteve. Anëtarët e delegacionit kanë bërë shumë pyetje ndër me kryesoret ato që lidhen me luftën ndaj korrupsionit dhe krimit të organizuar. Qeveria jonë do ta thotë fjalën e fundit, por përpara do të duhet të ketë aprovimin nga parlamenti".<br /><br />Kryetarja socialiste e Komisionit të Jashtëm Mimi Kodheli dhe deputetja demokrate Jorida Tabaku ndajnë qëndrime të ndryshme pas takimit me deputetët holandezë.<br /><br />"Deputetët morën një paraqitje si nga opozita dhe shumica për procesin për zbatimin e 5 rekomandimeve. Unë besoj se ishte takim i frytshëm dhe shumë pozitiv për ça u tha dhe u dëgjua", u shpreh deputetja Kodheli.<br /><br />"Opozita kërkoi që parlamenti holandez të mbështes hapjen e negociatave. Ata kanë shqetësime për krimin dhe drogën. Qëndrimi jonë ka qenë që hapja e negociatave do të ndihmojë që qeveria të monitorohet. Holanda heziton si pasojë e krimit shqiptar në Roterdam dhe Amsterdam, por edhe rritjen e krimit dhe trafikut të drogës në Shqipëri. Ne jemi optimistë, opozita do e mbështesë procesin", theksoi deputetja demokrate Jorida Tabaku.<br /><br />Ne fund të vizitës, 8 deputetë do të hartojnë një raport që do t'i dorëzohet parlamentit holandez.
