Duket se ping-pongu me dosjet nëpër gjykatat shqiptare do vazhdojë shumë gjatë. Vendimi i Gjykatës së Lartë për të unifikuar praktikën gjyqësore, pas ndryshimeve në Kodin e Procedurës Penale nuk ka funksionuar.<br /><br />Këtë të hënë, Gjykata e Tiranës ka vendosur të dërgojë në Gjykatën e Lartë për interpretim çështjen e vrasjes së gjyqtares Fildez Hafizi. Sipas gjyqtarit Sokol Tona, ky rast është kompetencë e Krimeve të Rënda dhe Shkalla e Parë nuk mund ta vazhdojë këtë proces.<br /><br />Fildez Hafizi u vra në datën 31 Gusht nga bashkëshorti i saj, Fadil Kasemi. Por me ndryshimet e bëra në Kodin e Procedurës Penale, në vitin 2017, vrasjet për motive familjare do të hetohen dhe gjykohen nga prokuroritë dhe gjykata e rretheve.<br /><br />Por kjo situatë solli një ngërç dhe u desh një vendim unifikues të Gjykatës së Lartë. Por pavarësisht këtij vendimi, ai interpretohet në mënyra të ndryshme nga gjykatat.<br /><br />Kështu, Krimet e Rënda kanë shpallur moskompetencë për disa dosje të regjistruara para datës 1 Gusht. Ndërsa gjykatat e rretheve ia kalojnë për interpretim Gjykatës së Lartë, duke qenë se vendimi lë vend për diskutim.<br /><br />Dosjet që pritet të kalojnë sa në një gjykatë në tjetrën janë kryesisht krime në familje dhe trafik ndërkombëtar të lëndëve narkotike.
