Оролга яқин минтақаларда табиий офатдан аҳоли соғлиги ва деҳқончилик хавф остида қолди (ВИДЕО)<br /><br />Ўзбекистоннинг шимолий ҳудудларида 26 май куни юз берган ёмғир аралаш туз бўрони 27 май куни Хоразм вилояти маркази Урганч шаҳрига етиб келди.<br /><br />Озодликка келаётган хабарларда Урганч аҳолиси нафас олиш қийинлашганидан шикоят қилмоқда. Одамларга ниқоб тақиб юриш тавсия қилинган.<br /><br />Маълумотларга қараганда, мазкур ҳудудда март ойида ҳам туз бўрони кўтарилган ва экинларга зарар етган эди. Туз бўрони ортидан ҳудудда жорий йилги деҳқончилик катта ҳалокат ёқасида қолган.<br /><br />Маълум бўлишича, бўрон Қорақалпоғистон, Хоразм, Навоий ва Бухоро вилоятларида ҳамдаТуркманистоннинг Дашўғиз вилоятида кузатилган.<br /><br />Ўзгидрометга кўра, мамлакатнинг шимоли-ғарбидан секундига 20 метр тезликда эсган кучли шамол қум-туз тўзонини кўтарган.<br /><br />“Ўзбекистон ҳаво йўллари” ширкатининг “Тошкент-Урганч-Москва” йўналишидаги рейси 27 май куни қум бўрони сабабли 4,5 соатга кечиктирилди.<br /><br />Ширкатнинг билдиришича, Тошкентдан Урганч орқали Москвага учаётган НУ-55 рейси пойтахтдан маҳаллий вақт билан соат 10:00да учган. Бироқ самолёт бўрон оқибатида Урганчга бора олмаган ва Бухоро аэропортига қўнишга мажбур бўлган.<br /><br />Бундан ташқари қум бўрони оқибатида “Тошкент-Урганч-Бухоро” рейси Нукусдаги заҳира аэродромидан амалга оширилган. Бу рейс ҳам 4,5 соатга кечиккан.<br /><br />27 май куни кечқурун 2 ларда Дашўғуз вилоятида табиий офат рўй бергани тўғрисида “Озодлик” радиоси туркман хизмати мухбири хабар қилди.<br /><br />Шимоли-ғарбдан сониясига 20 метр тезликда эсган шамол туз-қум бўронини кўтарган.<br /><br />Дашўғуз вилояти Туркманистоннинг экологияси яхши бўлмаган минтақаси ҳисобланади. Бу вилоятда Орол денгизининг қуриб бориш оқибатлари кучли сезилади. Маҳаллий аҳоли сувнинг сифати ёмонлиги ва ернинг шўрланишидан шикоят қилади. Бу минтақада туз-қум бўронлари тез-тез бўлмаса-да, ҳар ҳолда мунтазам кузатилади.<br /><br />“Озодлик” минтақадаги вазиятни ўрганмоқда.
