I rikthyer në Tiranë pas vendimit të Këshillit Europian, raportuesi për Shqipërinë në Parlamentin Europian, Knut Fleckenstein, mendon se vendi duhet uruar që tashmë ka nje datë për çeljen e negociatave.<br /><br />"Ajo që mund t'ju them është urime".<br /><br />Eurodeputeti nënvizion se Shqipërisë nuk i është vendosur asnjë kusht i ri.<br /><br />"Ajo që pritet është që të vazhdohet puna, të mos ndalohet procesi i reformave. Ka kushte, por nuk janë kushte të reja. Këshilli e tha fare qartë që kanë parë përparim në 5 prioritetet kyçe, por askush nuk duhet të ndalojë së punuari deri në çeljen e negociatave. Duhet vazhduar me procesin e vettingut. Duhet një ligj i mirë për reformën elektorale në përputhje me OSBE/ODIHR dhe mbështetje për të gjetur zgjidhje dhe qeveria duhet të përshpejtojë këtë proces. Aman këto nuk janë kushte të reja".<br /><br />Shtyrja e vendimarrjes pas 12 muajsh, ishte reflektim i problemeve të brendshme të unionit i cili po ashtu duhet t'i përmbush sikurse vendet aspirante reformat, detyrimet që ka për të vetëreformuar përpara se të hap dyert për t'u zgjeruar.<br /><br />"25 nga 28 vende anëtare thanë po të vazhdohet me negociatat. Znj. Merkel ka bërë të pamundurën ta bind Presidentin Macron, por që gjithsesi po të lexohen konkluzionet është një rezultat i mirë ky që kemi. Ato 3 shtete nuk mbështetën çeljen e menjëhershme të negociatave, nuk e kanë bërë këtë prej Shqipërisë por prej situatës brenda BE. Ata janë të bindur që duhet të zgjidhin problemet e tyre njëherë. Në rast se nuk i kemi zgjidhur problemet tona në BE, atëherë nuk do t'ju këshilloja të bëheshit shtet anëtar pasi dhe ne duhet të bëjmë detyrat tona të shtëpisë".<br /><br />I pranishëm në aktivitetin e organizuar për konkluzionet e Këshillit Europian nga fondacioni Fridich Ebert, ministri Bushati thotë se brenda këtij muaj nis procesi analitik kapitujt 23 dhe 24 që lidhen me lirinë, drejtësinë, sigurinë dhe të drejtat e njeriut. Por ai njeh domosdoshmërinë dhe apelon dhe për përfshirjen e opozitës në këtë proces, në mënyrë të veçantë për miratimin e reformës zgjedhore.<br /><br />"Por jemi vetëm njëra rrotë e biçikletës, sepse biçikleta ka dy rrota në këtë drejtim. Duhet dhe rrota tjetër, që është opozita dhe nuk duhet humbur kohë".<br /><br />Bashkëpunim me opozitën kërkoi dhe ambasadorja në ikje e BE, Romana Vlautin.
