U deshën 12 orë debate për të mbërritur tek votimi i projekt-ligjit që i hap rrugë projektit të ndërtimit të një Teatri të ri Kombëtar.<br /><br />Deputetët e opozitës vendosën të përdorin si gur të fundit bllokimin e foltores. Projekti u votua vetëm nga deputetët e mazhorancës. Opozita nuk mori pjesë.<br /><br />Demokratët dhe LSI-stët i flakën kartonët e votimit drejt Kryeministrit Rama dhe u larguan nga salla. Përpara votimit ra në sy një debat mes Kryeministrit Edi Rama dhe Ministrit të Diasporës, Pandeli Majko për çështjen e teatrit.<br /><br /><br />Burime të Tv Klan thanë se Majko i ka shprehur njërit prej anëtarëve të kabinetit se do të abstenonte për këtë projektligj. I vënë në dijeni për këtë qëndrim, Kryeministri Edi Rama i ka kërkuar Ministrit Majko që më mirë të largohej nga salla për të mos pasur pasoja të mëtejshme.<br /><br />Pas disa momentesh, Majko largohet dhe nuk merr pjesë në votim. Jashtë sallës së Kuvendit qëndroi deri në momentin e votimit, grupi i artistëve që kundërshton prishjen e godinës.<br /><br />Protestuesit, ashtu si opozita, shpresojnë tek mosdekretimi i ligjit nga Presidenti i Republikës. Një vendim i tillë me gjasë vetëm do të mund të shtynte në kohë shembjen e godinës së vjetër dhe nisjen e punës për ndërtimin e Teatrit të ri Kombëtar.<br /><br />Tv Klan
