АКШ президентин бейшембиде Британия премьери Тереза Мэй шаан-шөкөт, оркестрдин коштоосунда тосуп алды. Ошол эле маалда Трамп жергиликтүү The Sun гезитине маек куруп, Евробиримдиктен чыгуу саясатын чечкиндүү жүргүзбөй жатканы, кеп-кеңештерин укпаганы үчүн премьер айымды кескин сындады.<br /><br />АКШ президенти өткөн жумада кабыл алган “жумшак брекзит” саясатын жүзөгө ашыра турган болсо Британ өкмөтү менен соода келишимин түзбөй коюшубуз ыктымал деди. Кызматтан кеткен экс-тышкы иштер министри Борис Жонсонду "мыкты премьер-министр" катары көрүп турганын да жашырган жок.<br /><br />Бул тапта Лондондо Трамптын саясатына каршы британдар митингге чыгып, аны кебетесин чагылдырган алты метрлик шар үйлөштү. Алар Трампты сиркеси суу көтөрбөй турган, жалаякчан кичине баланын образында көрүп жатышат.
