Shiu i kësaj të hëne e boshatisi bregdetin. Sepse sapo nisën reshjet e para, temperaturat ranë menjëherë.<br /><br />Nuk gjeje në këtë fundkorriku në plazhin e Shëngjinit, as edhe një guximtar që të paktën të provonte të zhytej në det. Vetëm çadra dhe zhezlona bosh.<br /><br />Pushuesit ikën me të njëjtin vrull që kishin ardhur, duke krijuar sërish trafik në rrugët me shi.<br /><br />Këtu jemi në Shkodër. Disa orë më parë kjo ishte pedonalja e qytetit. Mes shtëpive karakteristike të zonës muzeale dhe mes picerive në dy anët e rrugës, rrjedh një lumë i rrëmbyer, i krijuar falë paaftësisë se kanalizimeve për të përballuar fluksin e ujit.<br /><br />Pamjet nga reparti i imazherisë në spitalin e qytetit, janë katastrofike. Uji u fut në katin e parë të godinës duke penguar punën e stafit mjekësor.
