Këshilli i Atlantikut të Veriut ka miratuar vendimin për të ndërtuar në Shqipëri bazën e parë ajrore në Ballkanin Perëndimor.<br /><br />Me fondet e Aleancës së Atlantikut të Veriut dhe në partneritet me Qeverinë e Republikës së Shqipërisë, NATO do të investojë mbi 50 milion euro, vetëm për fazën e parë të projektit për modernizimin e bazës ajrore të Kucovës.<br /><br />Lajmi është bërë i ditur nga Kryeministri Edi Rama në një postim në rrjetet sociale.<br /><br />Kryeministri shkruan se përmes këtij projekti, i cili pritet të nisë brenda këtij viti, Kuçova do të shërbejë si bazë mbështetëse për NATO-n për furnizim ajror; mbështetje logjistike; mbështetje për policimin ajror; si dhe trainime dhe stërvitje të Aleancës.<br /><br />"Kuçova do të shërbeje njëkohësisht edhe si bazë kombëtare për Forcën Ajrore Shqiptare dhe ky Investim strategjik i NATO-s në Shqipëri, do të sjellë një standart të ri për Forcat tona të Armatosura. Padyshim, një investim i këtyre përmasave krijon mundësi të reja për zhvillimin ekonomik e social të gjithë rajonit ku planifikohet ndërtimi i kësaj baze të re ajrore të teknokogjisë së fundit", shkruan Rama më tej.<br /><br />Kryeministri thotë gjithashtu se, paralelisht po zhvillohen diskutime direkte me partnerin tonë strategjik, SHBA, për modernizimin e mëtejsh kapaciteteve ajrore shqiptare. Së shpejti, pritet që vendimet e përbashkëta të këtyre diskutimeve do të shkojnë për miratimin e Kongresit Amerikan.<br />Televizioni Klan mëson se një nga këto vendime për të cilat shkruan Kryeministri është dhe blerja 2 helikopterëve ushtarakë Black Hawk. Vlera e një helikopteri të tillë i kalon 20 milionë dollarë. Vendimi i Këshillit të Atlantikut për bazën e Kuçovës u përshëndet edhe nga Ministrja e Mbrojtjes, Olta Xhaçka.<br /><br />Aeroporti i Kuçovës është ndërtuar në 1955. I vetmi investim i kryer në këtë bazë është në 2004, por aktualisht edhe pse qëndron i hapur, është në gjendje të amortizuar.
