Ligji i amenduar për ndërtimin e teatrit të ri është në tavolinën e punës së Presidentit të Republikës, ndërkohë që vetë kreu i shtetit ndodhet në SHBA, ku po merr pjesë në Asamblenë e Përgjithshme të OKB.<br /><br />Ligji mban të njëjtin numër me atë që u kthye nga Presidenti në parlament për rishqyrtim. Maxhoranca, e cila e miratoi e vetme ligjin, shprehet se ai është i njëjti, pavarësisht ndryshimeve që iu bënë. Një praktikë e ndjekur dhe më parë sipas saj, edhe në kohën kur maxhorancën në parlament e kishin të djathtët.<br /><br />Burime nga shumica thonë se ligji i është dërguar nga Kuvendi, kreut të shtetit, për shpallje siç e parashikon Kushtetuta.<br /><br />Por amendimi i ligjit në fjalë ka çelur një debat të ri. Opozita që prej miratimit në Komisionin e Veprimtarive Prodhuese, e cilësoi si antikushtetuese këtë hap të socialisteve. Pasi sipas saj, dekretet e presidentit pranohen ose rrëzohen dhe nuk mund të amendohen.<br /><br />Në rastet kur dekretet pranohen siç ndodhi për Ligjin për Teatrin, demokratët thonë se ligji në fjalë bëhet nul. Ata thonë se me amendimet që iu bënë konsiderohet një ligj i ri, çka sipas Kushtetutës i jep të drejtën presidentit ta kthejë sërish në Kuvend për rishqyrtim.<br /><br />Por ndryshe mendon shumica, burime pranë saj i thanë Tv Klan se presidenti është shprehur një herë për ligjin në fjalë ndaj kreu i shtetit mund t'i referohet vetëm nenin 85 të Kushtetutës për Ligjin për Teatrin, i cili parashikon që Presidenti i Republikës ka të drejtë ta kthejë ligjin për rishqyrtim vetëm një herë.<br /><br />Në këtë rast, thonë të njëjtat burime, Kreu i Shtetit ka dy rrugë ose ta dekretojë, ose ta miratojë në heshtje. Gjithsesi fjalën e fundit e ka presidenti Meta, i cili ka 20 ditë afat për t'u shprehur për ligjin e amenduar të teatrit.
