Të gjithë në moshë të re dhe në mesin e tyre kishin edhe një vajzë. Aktiviteti me të cilin merreshin? Vidhnin banesa nëpër qytetin e Fierit duke thyer bravat. Bëhet fjalë për 4 të rinj, të cilët përfunduan në prangat e autoriteteve policore, ndërsa si provë e aktivitetit të tyre kriminal, efektivët u gjetën disa prej sendeve të vjedhura, ashtu sikurse sendet që përdornin për vjedhjet.<br /><br />Anëtarët e kësaj bande janë Lediona Preçi, 21 vjeçe, Emanuel Doda, 23 vjeç, Bledar Skënderaj, 24 vjeç dhe Klaustin Zeneli, 22 vjeç, të gjithë banues në Vlorë.<br /><br />Sipas policisë, në bashkëpunim me njëri-tjetrin, katërshja "kryente vjedhje banesash me thyerje në qytetin e Fierit, duke thyer bravat e dyerve të banesave që vidhnin".<br /><br />Konkretisht, gjatë orëve të natës së datës 23 Tetor, ata janë kapur me sende të vjedhura në banesat e P.Th dhe O.T, në lagjen "15 Tetori".<br /><br />Autoritetet vijojnë punën për zbardhjen dhe dokumentimin e ngjarjeve të tjera të mëparshme në qytetin e Fierit, ku dyshohen se autorë janë pikërisht këta të rinj.<br /><br />Policia thotë gjithashtu se ata dyshohet se kanë kryer vjedhje banesash edhe në qytetin e Vlorës, për dokumentimin e të cilave po punohet me Specialistët e Hetimit të Krimit në Komisariatin e Policisë Vlorë./tvklan.al
