Në Maqedoni filloi faza e dytë e ndryshimeve kushtetuese. Identiteti dhe emri i shtetit si dhe zyrtarizimi i gjuhës shqipe, ishin tema për të cilat u debatua në ditën e parë të diskutimit.<br /><br />Ndërkohë, Komisioni Parlamentar për Mandatet dhe Imunitetin vendosi t?i rekomandojë parlamentit që deputetit Nikolla Gruevski, ish-Kryeministër, t'i hiqet mandati i deputetit.<br /><br />Debati për projekt-amendamentet e qeverisë për ndryshimet kushtetuese, ka ngritur një sërë kritikash, propozimesh dhe kërkesa nga deputetë të grupimeve të ndryshme politike.<br /><br />Kryeministri Zoran Zaev: "I kuptojmë këto dilemat, por marrëveshja i kufizon. Nuk është e përgjegjshme të thonë se jemi maqedonas të veriut. Gjeografikisht jemi të ndarë nga rajoni Maqedoni. Ky është çmimi që duhet ta paguajmë".<br /><br />Përpos sigurimeve të Kryeministrit Zaev se ka garanca se ndryshimet kushtetuese do të hyjnë në fuqi atëherë kur Greqia do ta ratifikojë marrëveshjen për emrin, nga opozita dyshojnë në sinqeritetin e Athinës zyrtare.<br /><br />"Greqia ende nuk na pranon, nuk pranon ekzistencën e popullit dhe gjuhës maqedonase. Ky element do të ketë ndikim anulues, do të përplasemi edhe në të ardhmen".<br /><br />Nga ana tjetër, deputetët e bllokut opozitar shqiptar edhe sot kanë kërkuar që në ndryshimet kushtetuese të përfshihet zyrtarizimi i gjuhës shqipe.<br /><br />Në Kuvendin e Maqedonisë ka nisur edhe procedura për heqjen e mandatit të deputetit, Nikolla Gruevskit. Komisioni me shumicë votash ka miratuar vendimin për t'i propozuar Kuvendit heqjen e mandatit ish-kryeministrit Gruevski.
