Drejtoria Vendore për Kufirin dhe Migracionin Tiranë ka hartuar një plan të detajuar masash për muajin Dhjetor 2018, me qëllim përballimin e fluksit në hyrje-dalje në aeroportin e Rinasit, për parandalimin dhe goditjen e paligjshmërisë duke bashkëpunuar ngushtë me autoritetet e tjera ligjzbatuese.<br /><br />Në një njoftim për mediat, policia e shtetit bën një përmbledhje për punën e bërë gjatë muajit Nëntor. Kështu, gjatë kësaj periudhe Policia e Rinasit ka evidentuar dhe goditur 66 raste të paligjshmërisë.<br /><br />Janë arrestuar dhe proceduar 10 persona për përdorim të dokumenteve të falsifikuara.<br /><br />Në drejtim të parandalimit të azilkërkimit, u është refuzuar dalja 207 personave, të cilët nuk plotësonin kriteret për të lëvizur në hapësirën Shengen.<br /><br />Po gjatë muajit Nëntor nga Policia Kufitare janë kapur 9 persona në kërkim për vepra të ndryshme penale për llogari të DVP-ve, si dhe janë proceduar penalisht 52 persona për kalim të paligjshëm kufiri.<br /><br />1 person është proceduar penalisht për mosdeklarim të hollash në kufi. Një person është arrestuar për mitdhënie, ndërsa një tjetër për kundërshtim të punonjësve të Policisë.<br /><br />Policia sqaron se gjatë muajit Nëntor kanë hyrë dhe dalë nëpërmjet aeroportit të Rinasit 203 694 shtetas shqiptarë dhe të huaj.<br /><br />"Policia Kufitare e Rinasit, për muajin Dhjetor 2018, duke pasur parasysh edhe përvojën e viteve të kaluara, por edhe tendencën në rritje të fluksit në hyrje dhe në dalje të qytetarëve dhe turistëve, do shtojë burimet njerëzore me qëllim ofrimin e një shërbimi sa më cilësor, si dhe do bashkëpunojë ngushtë me të gjitha agjencitë e tjera ligjzbatuese për të parandaluar dhe goditur paligjshmërinë", thuhet më tej në njoftimin për mediat./tvklan.al
