Qeveria u tërhoq kështu nga pagesa për provimet e mbartura, duke shfuqizuar atë pikë të Vendimit të Këshillit të Ministrave që detyronte studentët të paguanin për çdo provim të lënë për vjeshtë. Pagesa për provimet ishte edhe shkaku i protestës së studentëve të Universiteteve të Tiranës, që mbërriti në ditën e tretë.<br /><br />Por edhe pas kësaj tërheqje, të zyrtarizuar në takimin e ministres së Arsimit Lindita Nikolla me rektorët e Universiteteve, studentët nuk pranuan të shpërndaheshin. Ata shtuan kërkesa të tjera, mes të cilave edhe ajo për arsim falas. Studentët pretendojnë se tarifat vjetore në Universitete janë të papërballueshme.<br /><br />Pas rezistencës së tyre për të plotësuar edhe tre kërkesat e tjera që kanë të bëjnë me përgjysmim të tarifës vjetore të shkollimit, pjesëmarrje në bordet e administrimit të Universiteve dhe kushte më të mira në konvikte, ministrja e Arsimit, tha se edhe këto tre çështje do të shqyrtohen nga një grup i posaçëm pune.<br /><br />Por studentët e vijuan protestën edhe pas premtimit se të gjitha kërkesat e tyre do të merren në konsideratë. Ata paralajmëruan se protestën do ta zhvendosin edhe përpara Kryeministrisë.<br /><br />Protestës së iniciuar nga studentët e Arkitekturës dhe Urbanisitikës në ditën e tre të saj, iu bashkuan Universitetet në Elbasan, Korçë e Durrës. Studentët paralajmëruan bojkot të mësimit dhe vazhdimin e protestës edhe të premten.<br /><br />Tv Klan
