Edhe pse nuk ka dakordësinë e Partisë Demokratike, mazhoranca socialiste ka depozituar në Kuvend një projektligj për reformën zgjedhore, kur përfshihen dhe kërkesat e opozitës për përdorimin e teknologjisë në zgjedhje. <br /><br />Drafti i PS autorizon KQZ-në që të përdorë sisteme ose pajisje teknologjike për identifikimin biometrik të votuesve, votimin përmes pajisjeve elektronike, si dhe numërimin elektronik të votave të hedhura.<br /><br />Sipas këtyre parashikimeve, përdorimi i teknologjisë në zgjedhje duhet të aplikohet vetëm pasi të testohet me sukses, veprim ky që zor se mund të arrihet në zgjedhjet e qershorit të ardhshëm, për shkak të kohës së gjatë që duhet për tenderimet.<br /><br />Drafti parashikon edhe kërkesën e PS-së për votën e emigrantëve vetëm për zgjedhjet parlamentare. Propozohet që votat e diasporës tu shtohen mandateve në qarkun Tiranë, duke u konsideruar si një qendër votimi e posaçme.<br /><br />Emigrantët do ta marrin fletën e votimit përmes Postës Shqiptare në adresat e tyre zyrtare të banimit jashtë vendit, vetëm nëse ata do të kenë deklaruar vendbanim të përhershëm jashtë Shqipërisë, si dhe nëse kërkojnë të marrin pjesë në votime.<br /><br />Sipas këtij amendamenti, Partitë politikë dhe çdo kandidat e ka të ndaluar bërjen e reklamave politike në mediat publike e private kundrejt pagesës 3 muajt fundit para zgjedhjeve. Këtë ndalim e kanë edhe institucionet shtetërore.<br /><br />Një tjetër risi e amendamenteve është ajo që garanton barazinë gjinore në kandidim. Mosrespektimi i kuotave gjinore tani ndëshkohej me gjobë, ndërsa PS propozon që listat që nuk plotësojnë kriteret gjinore të mos pranohen fare nga KQZ. <br /><br />PS kërkon që ndryshimet në Kodin Zgjedhor të votohen brenda kësaj jave, por në Konferencën e Kryetarëve PD e ka kundërshtuar. Në kushtet kur ndryshimi i Kodit kërkon 84 vota, pa konsensusin e opozitës miratimi i tyre është i pamundur.
