Mosdekretimi i shkarkimit të ministrit të Jashtëm Ditmir Bushati dhe mosdekretimi pasuesit të tij, Genti Caka nga kreu i shtetit, ka krijuar ngërçin e parë në diplomacinë shqiptare.<br /><br />Në axhendën zyrtare të përfaqësueses së lartë për politikën e jashtme të BE, Frederica Mogherini, është planifikuar një takim me ministrin e Jashtëm të Shqipërisë, pasditen e 10 Janarit. Por burime zytare në Ministrinë e Jashtme nuk e konfirmojnë praninë e ministrit të enjten në takimin e planifikuar në Bruksel.<br /><br />Ministria nuk jep sqarime mbi arsyet, por mësohet se ato lidhen me largimin e Bushatit nga posti. Presidenti nuk e ka firmosur dekretin për shkarkimin e tij dhe ka sqaruar publikisht se mosdekretimi lidhet me rëndësinë që ka posti i ministrit të Jashtëm.<br /><br />Sipas tij, vendi nuk mund të mbetet për asnjë sekondë pa drejtuesin e këtij dikasteri që përfaqëson Shqipërinë në disa iniciativa shumë të rëndësishme.<br /><br />Përpara se të dekretojë ministrin e ri të Jashtëm, Presidenti do të shqyrtojë informacionin që ka kërkuar nga institucionet e sigurisë. E njëjta procedurë është kërkuar edhe për 4 ministra të tjerë të propozuar nga Kryeministri.<br /><br />Për Cakën, dhe Besa Shahinin që do të zëvendësojë Lindita Nikollën, Presidenti ka kërkuar informacion dhe nga institucionet në Kosovë, pasi të dy vijnë nga ky shtet.<br /><br />Firma e Presidentit po mban peng dhe vendimarrjen për mbledhjen ose jo të Parlamentit në seancë të jashtëzakonshme për të miratuar dekretet e kreut të shtetit.<br /><br />Kushtetuta i jep Presidentit të Republikës 7 ditë kohë për t?u shprehur për propozimet e Kryeministrit për ndryshime në qeveri, ndërsa Parlamenti ka 10 ditë kohë për t?i miratuar dekretet. Për 6 të larguarit dhe 4 ministra të rinj që janë dhe deputetë, Meta u shpreh në datën 5 Janar ndaj dhe sipas afateve kushtetuese Parlamenti duhet të mblidhet për t?i miratuar dekretet brenda datës 15 Janar.<br /><br />Mazhoranca është në pritje të hapit të radhës së Presidentit për të vendosur datën e seancës plenare. Sipas rregullores së Kuvendit, data 21 Janar është data zyrtare e nisjes së sesionit të ri parlamentar. Presidenti Meta nuk e dekretoi në propozimin e parë as ministrin e Brendshëm, Lleshaj, por e hodhi firmën pasi mazhoranca insistoi në emrin e tij, duke i dërguar një vendim të dytë.<br /><br />Tv Klan
