Partia Demokratike zgjodhi kryesinë e re të kohës Basha, por ajo që bie në sy është mungesa e emrave të PD-së historike të drejtuar nga Sali Berisha.<br /><br />Në ekipin prej 15 anëtarësh të zgjedhur nga Këshilli Kombëtar dhe 12 të tjerëve që futen automatikisht, vihet re mungesa e figurave që spikatën me kontributin e tyre që prej themelimit të kësaj force politike, por edhe shumë prej emrave të koopuara nga Sali Berisha në Janar të vitit 2005, e që i sollën demokratëve fitoren në zgjedhjet parlamentare të po atij viti.<br /><br />Arsyeja e këtij rikonfigurimi të ri në kryesinë e kohës Basha e ka zanafillën që kur shumë prej eksponentëve të kësaj force politike u lanë jashtë listës të kandidatëve për deputetë nga Lulzim Basha.<br /><br />Vendet që dikur mbanin në kryesinë e Berishës ish-nënkryetarja Jozefina Topalli, themeluesit e kësaj force politike Arben Imami e Genc Ruli, ish-ministrat Ridvan Bode, Majlinda Bregu e Sokol Olldashi apo ish-nënkryetari Astrit Patozi tashmë do të mbahen nga emra si Dhurata Çupi, Kreshnik Çollaku, Izmira Ulqinaku, Enno Bozdo, Oriola Pampuri, Endri Hasa apo Grida Duma.<br /><br />Nuk dihet se mbi çfarë baze e ka bërë përzgjedhjen e kandidaturave që i paraqiti për votim Këshillit kombëtar Lulzim Basha, por në PD historike të Berishës, selektimi i atyre që ngjiteshin në forumin që merrte vendimet më të rëndësishme politike do të duhet të kalonte më parë tre elementë; atë të kontributeve në parti, shpërndarjen gjeografike dhe përkatësinë fetare.<br /><br />Tv Klan
