Ministria e Infrastrukturës dhe Energjisë mohon se nisma e saj për krijimin dhe menaxhimin e rezervës së detyrueshme të naftës, do të shtojë kostot për tregtarët e karburanteve duke u reflektuar edhe në një rritje të çmimit. Zv/ministri i Infrastrukturës dhe Energjisë, Ilir Bejtja, sqaron në një intervistë për televizionin Klan, se nëse tregtarët do të rritin çmimin duke përdorur këtë argument, atëherë ky do të jetë një abuzim.<br /><br />Ilir Bejtja thotë se prej vitesh grosistët e naftës kanë detyrimin që të mbajnë rezervën e kësaj lënde për 90 ditë, e cila aktualisht është llogaritur në strukturën e çmimit të shitjes për qytetarët. Janë 320 milionë dollarë në vit që kjo industri duhet të ketë sasi nafte për rezervën kombëtare. Ai thotë se ligji i ri në fakt do të shkurtojë kostot me 15%, pasi gjysma e sasisë që do të mbahet është naftë e papërpunuar.<br /><br />Pyetjes nëse tregtarët nuk e kanë respektuar mbajtjen e rezervës së sigurisë kombëtare dhe tashmë ligji do të krijojë kosto të reja, Ilir Bjetja i përgjigjet kështu: ?Nëse e kanë bërë këtë duhet të shkojnë për ndjekje penale, kanë shkelur rregullat e sigurisë kombëtare??<br /><br />Ligji i ri vjen si një detyrim i Marrëveshjes së Stabilizim Asociimit me Bashkimin Europian, dhe ligjit për shërbimin publik. Drafti parashikon ngritjen e një agjencie e cila do të krijojë dhe menaxhojë rezervën kombëtare, ku për këtë qëllim tregtarët do të paguajnë edhe një tarifë në momentin që paguajnë akcizën e naftës. Shoqata e Hidrokarbureve tha një ditë më parë se çdo kosto e re do të shkojë te çmimi i naftës që u shitet konsumatorëve.<br /><br />Tv Klan
