Ngjarjet e kohëve të fundit, ku një efektiv i Gardës vrau gruan e tij, apo dyshimi se një efektiv policie në Gruemirë ka ngacmuar seksualisht një të mitur ka vënë në pikëpyetje testin psikologjik që ata kryejnë për t'u bërë pjesë e forcave të rendit. Sipas Sindikatës të Punonjësve të Policisë, rreth 70 % e efektivëve kanë mbistres në punën e tyre.<br /><br />"Baza e një ndryshimi psikologjik të një punonjësi, është baza social ekonomike, duke filluar pastaj në lindjen e depresionit, dhuna ndaj fëmijëve, gruas, vetëgjyqësi dhe xhelozi. Elementi i stresit në Policinë e Shtetit është aq i lartë, sa mbi 70 % të punonjësve janë në stres për shkak të kushteve social ekonomike, në të cilën përballojnë jetesën".<br /><br />Por drejtori i Akademisë së Sigurisë, Bilbil Mema, gjatë pyetjeve të opozitë në Komisionin e Sigurisë tha se ka vështirësi për të matur me saktësi gjendjen e çdo personi kandidat për polic.<br /><br />"Ne bëjmë teste psikologjie pasi është një nga kriteret për t'u futur në polici, por ka shumë vështirësi për të matur me saktësi gjendjen e çdo personi. Kur mbarojnë janë të ndarë se çfarë karakteri i përkasin, pasi bëhet ndarje për në terren dhe shikohet si bashkëpunojnë me të tjerët".<br /><br />Për këtë arsye, Fishta thotë se është e domosdoshme prezenca e psikologut edhe gjatë ushtrimit të detyrës nga efektivët.<br /><br />"Një psikolog kemi në Forcat Speciale, por psikologu duhet të jetë në të gjitha strukturat për shkak të përgjegjësisë që ka sot një punonjës policie në realizimin e detyrës që ka, pasi është i armatosur, nëse nuk është normal nga gjendja psikologjike. Vetë ngjarjet e fundit tregojnë që prezenca e psikologut është mjaft e domosdoshme në strukturat e bazës dhe ato të qarqeve. Pasi t'i japësh armën një personi të papërshtatshëm me shenja skizofrenie, është njësoj si të vrasësh".<br /><br />Interesimit të Televizionit Klan, Ministria e Brendshme thotë se kandidatët për policë kalojnë pranë një komisioni të veçantë vlerësimi, ku përveç testimit me shkrim e gojë, si dhe atij fizik, ata vlerësohen edhe në testimin psikologjik dhe nëse këtë të fundit nuk e kalojnë, ata skualifikohen. Por vetëm pak ditë më parë, 44-vjeçari Alket Arapaj, efektiv i Gardës së Republikës e vrau me armën e shërbimit bashkëshorten e tij.<br /><br />Tv Klan
