Banorët e fshatit Karaqevë të Kamenicë, fshat në afërsi të kufirit me Serbinë tani e 20 vjet jetojnë në ankth. Shumë toka kanë frikë ti punojnë për shkak të shqetësimeve nga xhandarmëria serbe. Policia e Kosovës dhe KFOR-i vizitojnë këtë fshat vetëm duke ndjekur rrugët alternative.<br /><br />Kjo është rruga që të shpie në fshatin Karaqevë të Komunës së Kamenicës, fshat ky afër kufirit me Serbinë. Ndërsa kjo shenjë paralajmëron ndalesën e qarkullimit të automjeteve të veturave të KFOR-it dhe UNMIK-ut.<br /><br />Ndonëse fshati është disa kilometra më tej, rruga që të dërgon atje, nuk shfrytëzohet edhe nga Polica e Kosovës dhe veturat e tjera zyrtaret të shtetit.<br /><br />Banorët këtë rrugë e shfrytëzojnë në mënyrë ilegale, por nuk pengohen nga askush.<br /><br />Selver Lenjani- Përfaqësues i Banorëve të Karaqevës :Ky nuk është problem vetëm i banorëve të këtushëm.<br /><br />Këtu prapa meje është një postbllok i policisë së Serbisë, vend ky që shënon ndarjen administrative ndërmjet Kosovës e Serbisë, megjithatë në këtë vend ku jam unë e në fshatin Karaqevë shpesh hyn xhandarmëria serbe duke shqetësuar banorët e këtushëm.<br /><br />Ismajl Kastrati 84 vjeç nga po ky fshat, thotë se familja e tij merret me bujqësi.<br /><br />Por sipas tij janë të kufizuar për të punuar tokën meqë është në zonë kufitare. Ndërsa barinjtë shpesh janë arrestuar për tu gjobitur më pas në Vranjë të Serbisë.<br /><br />Ismajl Kastrati- banori Karaqevës: Derisa tokat që i kanë në pjesën e Serbisë as nuk u shkon ndërmend ti punojnë.<br /><br />Banorët thonë se tani e 20 vjet janë në mëshirë të fatit. Deri më tani janë ankuar në të gjitha institucionet relevante por kanë hasur në vesh të shurdhër.<br /><br />Shpresat për një zgjidhje të situatës pothuaj janë shuar, ndërsa me ankth presin dhe marrëveshjen përfundimtare Kosovë- Serbi.<br /><br />Tv Klan
