Ka nisur takimet e para për të konkretizuar vendimin e marrë në bllok nga opozita e bashkuar për djegien e mandateve. Lideri demokrat Lulzim Basha, e nisi këtë të martë me një takim në selinë blu me kreun e Këshillit Kombëtar të PD-së, Bujar Nishani, njëherësh ish-president. Do të jetë pikërisht ky këshill që do të marrë përfundimisht vendimin për djegien e mandateve të deputetëve.<br /><br />Në një prononcim për gazetarët pas takimit, kryedemokrati Basha tha se nga e enjtja nuk do të ketë më parlament. Ditë kur opozita, pas tubimit të së shtunës para kryeministrisë, do të mblidhet në një protestë tek parlamenti.<br /><br />"Nuk ka kthim prapa, nuk është thjesht djegie mandatesh, nuk do ketë më parlament, nuk do ketë parlament fasadë, ata mund të mblidhen të marrin vendime dhe shqiptarët do i përgjigjen. Ne do të jemi krah qytetarëve", tha Basha.<br /><br />I dha sqarim edhe qeverisë tranzitore: Dorëheqja e Ramës dhe hetimi i tij.<br /><br />Detyra e parë e qeverisë tranzitore - tha Basha - "do të jetë të arrestojë politikanin e kapur në vjedhje votash, Vangjush Dako, kryebashkiak i Durrësit".<br /><br />"Qeveria e ndalon arrestimin e tij, duhet të mos ketë asnjë ndërhyrje politike si ajo e Ramës për të mos arrestuar Dakon. Një nga arsyet e shkarkimit të Xhafës ishte që për luftën e klaneve rrezikoi arrestimin e Vangjush Dakos. Damian Gjiknuri që është kapur duke vjedhur vota duhet të shkojë në burg", përfundoi kryetari i Partisë Demokratike.
