Deri tani i kanë dorëzuar formularët e dorëheqjes në protokollin e Kuvendit, 56 deputetë, 39 nga Partia Demokratike dhe 17 nga LSI. 5 deputetë ende nuk kanë nënshkruar.<br /><br />Nuk ka firmosur siç kishte njoftuar Lefter Koka, por akoma nuk ka shpjeguar mos dorëzimin e mandatit deputeti i PD-së Myslim Murrizi. Ndërsa me argumentin se janë jashtë Shqipërinë, demokratët janë në pritje të firmës së Rudina Hajdarit, Fatmir Mediut dhe Nard Ndokës.<br /><br />Po çfarë do të ndodhë tani me 56 mandatet e dorëzuara?<br /><br />Deputetët e opozitës nuk u paraqitën një nga një në protokollin e Kuvendit. Kjo mund të bëjë që brenda afatit 30 ditor që Kodi Zgjedhor i njeh Kuvendit, këshilli i mandateve të thërrasë një nga një deputetët që të konfirmojnë dorëzimin e mandatit.<br /><br />Më pas, Kuvendi është i detyruar brenda 23 Marsit t?i përcjellë kërkesat pranë Komisionit Qendror të Zgjedhjeve. Brenda 30 ditëve edhe KQZ duhet të shprehet për ndërprerjen e mandatit të deputetëve të opozitës. Nuk përjashtohet mundësia që edhe ky institucion ti thërrasë fizikisht të gjithë deputetët.<br /><br />Në rast se të gjithë konfirmojnë bindjen për të djegur mandatet, atëherë KQZ duhet të ndërpresë këto mandate dhe tua kalojë ato kandidatëve në listën vijuese të PD dhe LSI.<br /><br />Por PD dhe LSI kanë marrë masa që as kandidatët në pritje të mos e pranojnë mandatin. Selitë qendrore kanë mbledhur deklarimet e tyre ku shprehen se refuzojnë mandatet, formularë të cilat pritet të depozitohen në KQZ në ditët në vijim. Në këtë pikë shteron fantazia e ligjbërësve se kujt i shkojnë mandatet e djegura nga opozita.<br /><br />Por 60 ditë kohë janë përpara se të mbërrijmë në këtë udhëkryq, të mjaftueshme për një zgjidhje politike, apo për influenca selish diplomatike.<br /><br />Deri në vendimmarrjen e KQZ-së për tu ndërprerë mandatet, të gjithë të dorëhequrit e opozitës janë deputetë të Kuvendit të Shqipërisë dhe gëzojnë të gjitha privilegjet që ligji ju jep.
