Televizioni Klan ka mundur të zbardhë letër-porosinë e mbërritur nga Shtetet e Bashkuara të Amerikës mbi kontratat e lobimit të Partisë Demokratike. Janë gjithsej 675 mijë dollarë, të cilat janë përdorur për lobim nga PD në pranverën e vitit 2017, disa muaj para zgjedhjeve parlamentare të atij viti, të zhvilluara në 25 Qershor.<br /><br />Vetë Partia Demokratike nga llogaritë e tij ka paguar 75 mijë dollarë për kontrata lobimi në SHBA me qëllim promovimin e liderit konservator Lulzim Basha. Janë tre këste me nga 25 mijë dollarë të cilat kanë dalë nga financat e PD-së dhe janë të justifikuara.<br /><br />Por në materialin e mbërritur në Prokurorinë e Tiranës janë edhe disa kontrata të tjera që janë lidhur për lobimin e PD.<br /><br />Gazetarët e Televizionit Klan e kanë konsultuar materialin e mbërritur në Prokurorinë e Tiranës, në të cilin flitet për katër kontrata me vlerë 600 mijë dollarë, origjina e të cilave është e dyshimtë. Paratë vijnë nga kompania Biniata Trade.<br /><br />Kjo kompani, sipas materialit të mbërritur nga Shtetet e Bashkuara, ka pronarë dy shtetas rusë. Nga kjo firmë drejt kompanisë së lobistit Nikolas Muzin janë nisur katër pagesa me nga 150 mijë dollarë dhe qëllimi i këtyre parave është lobimi i Partisë Demokratike Shqiptare.<br /><br />Sipas kontratave, paratë do përdoreshin për takime me administratën e Presidentit amerikan, Donald Trump, kongresmenë amerikanë dhe intervista në media të ndryshme në SHBA.<br /><br />Në këtë kohë, lideri demokrat pati një takim dhe me Presidentin Trump, me të cilin bëri edhe një fotografi. Kjo është vetëm një pjesë e informacionit të mbërritur nga Shtetet e Bashkuara, pasi Prokuroria pret dëshminë e Nikolas Muzin.<br /><br />Ajo konsiderohet mjaft e rëndësishme për hetimin, pasi pritet të sqarojë Partia Demokratike ka qenë në dijeni të këtyre financimeve.<br /><br />Në Prokurori për këtë çështje një vit më parë u pyetën dy zyrtarë të PD-së, ish-sekretari Arben Ristani dhe financieri i PD. Të dy mohuan financime të dyshimta nga kompani të ndryshme, duke sqaruar se pagesat janë transparente.<br /><br />Tv Klan
