REPORT TV zbulon se deputeti Ylli Shehu që pranoi që të merrte mandatin nga listat e LSI-së nuk ka deklaruar një dënim. Dënimi me gjobë që ka marrë në 2008 nuk i rrezikon mandatin deputetit, por fshehja e tij po. Por për cfarë është dënuar deputeti? Gjykata e Shkallës së Parë në Korçë në vitin 2008 e ka dënuar me 600 mijë lekë për dy vepra penale, falsifikim dhe kontrabandë.<br /><br />Ylli Shehu u akuzua se në vitin 2003 kishte futur nga Greqia në Shqipëri automjetin BMW X5 pa paguar detyrimin e saktë doganor. Shehu, mjetin e tij BMW X5 me Nr.shasie WBAFA71050LN18681 kishte dashur ta targonte duke iu shmangur detyrimit doganor dhe për këtë ai kishte paraqitur në degën e Doganës Korcë dokumente zhdoganimi të cilat nuk paraqesnin realitetin, pasi pasqyronin një mjet BMW AG, me vit prodhimi 1989, dhe jo mjetin real BMW X5, prodhim te vitit 2001. <br /><br />Nëpërmjet këtij veprimi Ylli Shehu kishte mundur të shmangej nga detyrimi doganor në shumën 1.119.109 lekë duke paguar vetëm shumën prej 154.421 lekë. Këtë vendim ai nuk e ka deklaruar në formularin e vetëdeklarimit të dekriminalizimit.<br /><br />Deputeti Ylli Shehu rezulton i dënuar për kontrabandë mallrash edhe nga Gjykata e Tiranës në vitin 2007. Dënimin nga gjykata e Tiranës ai e ka pasqyruar në formularin e tij, por të Korçës, jo dhe mund ti kushtojë mandatin e deputetit. Theksojmë se Ylli Shehu është verifikuar njëherë nga prokuroria në mandatin e parë si deputet, 2013-2017. Ylli Shehu u betua si deputet në Kuvendin e Shqipërisë në datë 5 mars.
